اختبار السمات للكلية الحربية وكلية الشرطة :-
السلام عليكم ورحمة الله -تعالى- وبركاته أحبتى فى الله فى مصر، اليوم أقدم لكم أهم الشروط وبعض النصائح لكي تجتاز اختبار السمات للكلية الحربية وكلية الشرطة وازاي تعدى منه، طبعا كلنا عارفين مدى صعوبة اختبار السمات وده لأنو عبارة عن أسئلة عامة، والحقيقة إنها مش أسئلة عامة بس، اختبار السمات بيتكون من أسئلة عامة ومسائل رياضية وأسئلة تحليل شخصية، فأنا هقدم لكم النهارده بعض النصائح اللى هتساعدكم بشكل كبير جدا فى الاجتياز وعن تجربة شخصية ، وقبل ده هنتكلم عن الشروط الأساسية ويعنى اى اختبار السمات أصلا، وبعدين نخش فى النصائح المهمة جدا ..اقرأ للآخر .
يعنى اى اختبار السمات واى الل بيحصل فى الاختبار:-
اختبار السمات هو اول اختبار هيقابلك فى اختبارات الكليه الحربيه وبيكون يوم استلام الملف الخاص بك .
بيكون 25 سؤال مقسمه ل معلومات عامة وأسئله ذكاء وأسئلة تحليل الشخصية وأسئله رياضية.
بعد استلام الملف بتاخد رقم القيد وتروح مظله الاختبار وتقعد حسب العسكري مبيقولك، وبعد اكتمال المظلة بتتقسم لمجموعات تحت قيادة عساكر موجودة هناك، العسكري بيدخلك مكان الاختبار، الاختبار بيكون إلكتروني وده النظام الجديد المطبق من سنتين تقريبا، بتقعد على كمبيوتر والرائد بيقولك ابدأ امتحن وانت بتدخل على ملف مكتوب عليه امتحان سمات على الكمبيوتر، بتكتب فى خانة الرقم القومى رقمك القومى وبتكتب رقم القيد فى خانة رقم القيد، وكل ده بيكون موجود على الكارت اللى هيكون معاك، وبعدين تضغط على ابدأ الاختبار والاختبار بيكون حوالى ربع ساعة بس الأسئلة بسيطة جدا متقلقش.
وخلى بالك ان مفيش وقت ف مينفعش تقول هسيب السؤال ده لبعدين لأ ، السؤال الل يقف معاك اختار أقرب اجابة او اختار عشوائى وخش على الل بعده.
خليك واثق فى نفسك كويس جدا واتكل على الله ، وكمان هتلاقى الضباط بيتعاملو معاك كويس هناك ف متقلقش وخلى ثقتك فى الله كبيرة .
نصائح مهمة لاجتياز اختبار السمات :-
مبدأيا كده لازم تعرف إن اختبار السمات مش معلومات عامة بس ده تقييم للملف بالكامل .
كمان لازم تحافظ على سلامة الملف وتركز فى التعليمات الل هيعرفوها لك عشان تملى الملف .
اوعى تسيب خانة فاضية ولو سألك عن حاجة زي مؤهل جدك وعنوانه ووظيفته بس جدك متوفى ، ف انت بتتكتب مؤهله ووظيفته وعنوانه قبل الوفاة وبتكتب جمبو (متوفى) . ولو سألك على أملاك الوالده ومفيش أملاك تعمل اى ؟ تكتب لا يوجد.
مهم انك تركز فى المقاس بتاع الكارت الطولى للوالدين بيكون 10×15 خلفية بيضاء.
(هام جدا ):- لازم كل أوراقك تكون الورقة الأصل، ولو فى صورة لازم تكون الصورة طبق الأصل ومختومة بختم النسر، طب ولو مش عارف تختمها بالنسر تعمل اى ؟ تاخد الأصل معاك توريها للضابط الل هيستلم منك الملف وهو يختملك عليها هناك.
اليوم الل انت رايح تسحب الملف فيه تكون نضيف كده، ولابس شيك وحالق شعرك ودقنك لان ده مهم جدا.
اوعى تغير صورك الل استلمتها منهم لان شكلك وحش فيها وتحط صور ملكى ، لأن المعظم بيسقط بالحركة دى .
شااهد أيضا.. نصائح مهمة للقبول بكلية الشرطة عن تجربة وازاي تقبل!
شااهد أيضا.. نصائح مهمة للقبول بكلية الشرطة عن تجربة وازاي تقبل!
بالنسبة بأه للاختبار نفسه :-
مبدأيا كده لازم تظبط نفسك فى المعلومات العامة ، يعنى تحفظلك شوية معلومات كده حلوين يساعدوك فى الاختبار الموضوع بسيط خالص يعنى لو محفظتش ورحت كده عادى برضو، لان معظم الاسئلة تحليل شخصية ومسائل رياضية واسئلة ذكاء، ودى مش ببتحفظ.
طب مثال على الأسئلة مثلا يقولك لو رايح فرح لواحد صاحبك وهدومك اتبهدلت هتروح الفرح مبهدل ولا هترجع تانى ولا هتخش تشترى هدوم جديدة ...وهكذا. دى مش بتتحفظ بس عايزه تجاوب عليها بحكمة مش اكتر.
تانى حاجة لازم تكون واثق فى نفسك شوية ومتخافش من الاختبار خاالص .
كمان لازم متقفش تفكر فى سؤال اكتر من 30 ثانية لاقيتو هياخد معاك تفكير اختار اجابته عشوائى ومتفكرش كتير ؛ وده لأن مفيش وقت تفكر أصلا .
وبرضو أهم حاجه اوعى تتوتر اوعى تتوتر ، التوتر ده هيطير المعلومات من دماغك حتى لو انت عارفها مش هتعرف تحلها ، زي م قلت قبل كده خليك واثق ف نفسك وسيبها على الله .
-------------------------------------
وبكده خلصنا كلام ، لو حد عندو أي استفسار مستنى كومنتات بأي أسئلة وانا هرد عليك شخصيا وف أسرع وقت...بالتوفيق للجميع.
Tags
أخبار